Biz ötən gün "DogruXeber.az" olaraq Qusar rayon Piral kənd tam orta məktəbində baş verən təcavüz və kriminal hadisələrlə bağlı geniş yazı yaymışdıq. Bildirmişdik ki, həmin məktəbin direktoru Ağamət Ağamətovun fəaliyyəti ilə bağlı redaksiyamıza daxil olan çoxsaylı faktlar ardıcıl şəkildə ictimailəşdiriləcək.

İndi isə həmin silsilənin davamını təqdim edirik.

Növbəti faktlar məktəbdə həm tədris mühitinin, həm də idarəçilik sisteminin nə qədər bərbad vəziyyətdə olduğunu açıq şəkildə sübut edir.

Məlumata görə, məktəbin direktoru Ağamət Ağamətov müəllim heyətindən şəxsi təsərrüfatında işçi kimi istifadə edir. Belə ki, riyaziyyat müəllimi Marif Nuraliyevin direktora məxsus təsərrüfatda qoyun sağması faktı qeyd olunur. Bu biabırçı əməl nəinki müəllim nüfuzunu ciddi şəkildə zədələyib, hətta nəticədə həmin müəllim başqa kənd məktəbinə köçmək məcburiyyətində qalıb. Təhsil sistemində belə alçaldıcı davranışın mövcudluğu özü artıq cinayət səviyyəsində pozuntudur.

Daha bir qalmaqallı iddia – məktəbdə dərsə gəlməyən “şagirdlər”lə bağlıdır. Məsələn, direktorun qohumu Ağalarov Emil Ziyaməddin oğlu rəsmi sənədlərdə məktəbin X sinif şagirdi kimi görünür, amma realda Qusar şəhərindəki “Ay işığı” restoranında ofisiant işləyir. Belə çıxır ki, həmin şəxs gün ərzində nə dərsə qatılır, nə də qiymətləndirmə prosesində iştirak edir. Bu isə həm məktəbə ayrılan dövlət vəsaitinin mənimsənilməsi, həm də təhsil sənədlərinin saxtalaşdırılması anlamına gəlir.

İddialar bununla da bitmir. Direktor Ağamət Ağamətovun həyat yoldaşı Akina Ağamətovanın evdə pullu hazırlıq keçdiyi, ona yönləndirilmiş məktəb şagirdlərinin – o cümlədən 11-ci sinif şagirdləri Muradxanova Liana, Abbasov Orxan, Ağamirzəyev Zamir və başqalarının – məktəbə ilboyu getmədikləri deyilir. Bununla belə, həmin şagirdlər jurnallarda "nizam-intizamlı" göstərilir, qiymətləri “yazılır” və ali məktəbə qəbul prosesi üçün sənədləri düzəldilir.

Məktəbdə dərsdənkənar məşğələlərin yalnız kağız üzərində keçirildiyi, jurnallarda yalan məlumatlar yazıldığı və bununla da dövlət vəsaitinin mənimsənilməsi ehtimalı üzrə ciddi şübhələr mövcuddur. Bu hallar artıq təkcə etik və peşə pozuntusu yox, həm də hüquqi məsuliyyət tələb edən cinayət əməlləridir.

Ən rüsvayçı məqam isə budur: İddialara görə, məktəbin direktoru Ağamət Ağamətov MİQ imtahanından keçməyən şəxsi – Gülnarə Əlixanovanı rus dili müəllimi kimi təyin edib. Bu azmış kimi, təşkilatçı vəzifəsi də direktora yaxın qohum olan Admiral Kiçibəyova həvalə olunub. Sanki məktəb yox, qohum-əqrəbanın idarə etdiyi ailə biznesidir. Hətta Ağamət Ağamətov öz həyat yoldaşı Akina Müzafəddinovnanı da “qabaqcıl müəllim” kimi təltif etdirib. Təltif nəyə görə? Bəlkə şagirdləri məktəbdən yayındırıb öz evinə hazırlığa yönləndirdiyinə görə?

Elm və Təhsil naziri Emin Əmrullayev, Quba-Xaçmaz Regional Təhsil İdarəsinin müdiri Coşqun Əliyev bu qədər rüsvayçı fakt qarşısında hələ də susursa, deməli bu sistemin çöküşü sadəcə bir direktorla deyil, bütöv idarəetmə modeliylə bağlıdır.

Qeyd edək ki, bu məktəb barəsində "DogruXeber.az"a daxil olan məlumatlar çoxdur və biz həmin faktları silsilə şəkildə dərc etməkdə davam edəcəyik.

Hər kəsin söz haqqını tanıyırıq və əgər bu yazıda adı keçən şəxslər öz mövqelərini bildirmək istəsələr, onların cavab haqqını da dərc etməyə hazırıq.

DogruXeber.az