Qlobal.az Milli Məclisin 5 ən varlı biznesmen deputatlarının siyahısını təqdim edir.


Kəmaləddin Qafarov Naxçıvan Dövlət Universitetinin meyvə-tərəvəzçilik və üzümçülük fakültəsini bitirib. İkinci ali təhsilini Azərbaycan Dövlət İqtisad Universitetində maliyyə və kredit ixtisası üzrə alıb. 2005-2013-cü ildə adı açıqlanmayan əczaçılıq şirkətində müxtəlif vəzifələrdə çalışıb. V və VI-cı çağırış üzrə Milli Məclisin deputatıdır. 2014-cü il sentyabrın 17-də Azərbaycan Respublikasi Səhiyyə Nazirliyi Milli Onkologiya Mərkəzinin Baş direktor müavini vəzifəsinə təyin olunub. Mediada yazılanlara görə Kəmaləddin Qafarovun nəzarətində olan şirkətlər dövlət sifarişi ilə dərman pereparatlarının və tibbi ləvazimatların ölkəyə idxalını təşkil edir. Bu şirkətlərin illik dövriyyəsinin on milyonlarla manat civarında olduğu yazılır. Mediada yazılanlara görə deputata məxsus dərman idxalı ilə məşğul olan şirkətlərdən biri "Azəri Med" Qapalı Səhmdar Cəmiyyətidir. Bu şirkət hər il dövlət satınalmalarından milyonlarla vəsait qazanır. Şirkətin ən son qalib olduğu satınalma bu ilin avqust ayının 11-də olub. "Azəri-Med" QSC İnnovasiya və Təchizat Mərkəzinin 14 milyon manatlıq tenderində qalib elan edilib. Bakının ən məşhur və bahalı şadlıq evlərindən olan "Versal PALACE"nin də deputat Kəmaləddin Qafarova məxsus olduğu deyilir. Bu şadlıq sarayına deputatın qardaşı Cəlaləddin Qafarov nəzarət edir. Deputat indiyədək bu yazılanları təkzib etməyib.


Məşhur Məmmədov Milli Məclisinin VI çağırış deputatıdır. Dövlət Neft və Kimya Universitetinin məzunu olan M.Məmmədov Azərbaycan Mebel İstehsalçıları Assosiasiyasının sədridir. "Tərəqqi" medalı ilə təltif edilib. Azərbaycanın ən böyük mebel şirkətlərindən olan Embawood şirkətinin sahibidir. Yerli mediada yazılanlara görə Məşhur Məmmədov hökumətdə təmsil olunan yüksək vəzifəli şəxslərlə ölkə xaricində şərikli biznesə sahibdir. Məşhur Məmmədovun Türkiyədə, Rusiyada və ABŞ-da da biznes şəbəkəsinin olduğu bildirilir.


Cavanşir Feyziyev 10 ildən artıqdır ki, Milli Məclisin deputatıdır. Azərbaycan Pedaqoji Xarici Dillər İnstitutunun Fransız və ingilis dilləri üzrə tərcümə fakültəsini bitirmişdir. Fəlsəfə üzrə fəlsəfə doktorudur. «Şöhrət» ordeni ilə təltif edilmişdir. Azərbaycan Jurnalistlər Birliyinin və Azərbaycan Yazıçılar Birliyinin üzvüdür. 8 monoqrafiyanın, 70-dən çox elmi məqalənin müəllifidir. Rus, ingilis və fransız dillərini bilir. 1995-ci ildən ABŞ-ın «Philip Morris» şirkətinin Qafqaz nümayəndəliyində şöbə müdiri, 1998-ci ildən «Planet Ko Ltd» şirkətinin direktoru vəzifələrində çalışmışdır. 2003–2010-cu illərdə «Avromed» Məhdud Məsuliyyətli Cəmiyyətinin direktoru olmuşdur. Cavanşir Feyziyevin dərman və siqaret biznesi ilə məşğul olduğu barədə mediada dəfələrlə yazılıb.


Ülvi Quliyev 2005-ci ildən indiyə kimi Milli Məclisin deputatıdır. Avronest Parlament Assambleyasında Azərbaycan nümayəndə heyətinin üzvüdür. Azərbaycan Karate-do Federasiyaları Assosiasiyasının prezidentidir. Mediada yazılanlara görə Ülvi Quliyev İngiltərədəki GUANO LİMİTED (qeydiyyat nömrəsi 06353306) şirkətinin sahibidir. Deputatın oğlu Orxan Quluzadənin Peterburqda NEO GROUP LTD şirkətinin olduğu barədə də mediada yazılar tirajlanıb. Mətbuatda gedən xəbərlərə görə Ülvi Quliyevin nəzarətində olan şirkətlər Bakıda yaşayış binasının tikintisi ilə də məşğul olur. Deputat bu məlumatları təkzib etməyib. Deputatın incəsənətə xüsusi meylinin olduğu, bir çox mədəni layihələri maliyyələşdirdiyi də dolaşan xəbərlər sırasında yer alır.


Xanlar Fətiyev Milli Məclisinin IV, V və VII çağırış deputatı, Azərbaycan Üzgüçülük Federasiyasının prezidentidir. Azərbaycan Memarlıq və İnşaat Universitetinin Sənaye və mülki tikinti fakültəsini bitirib. 1988-ci ildən «Aztransqaz» İstehsalat Birliyinin 2 saylı mexanikləşdirilmiş kolonunda fəhlə, usta işləyib. 1992-ci ildən «Betonçu» kooperativinin mühəndisi, sədri, 1994-cü ildən «Elruz» kiçik müəssisəsinin sədri, 1997- ci ildən «Avestas» firmasının baş direktoru, 2003-cü ildən «Aznur» Məhdud Məsuliyyətli Cəmiyyətinin baş direktoru, 2004–2011-ci illərdə Gəncə Avtomobil Zavodunun direktoru vəzifələrində çalışıb.