“Göz əməliyyatından artıq 3 il keçib və bu müddətdə mən filmlərə çəkilə bilərdim. Sağlamlığım isə əvvəlkindən daha da pis vəziyyətə düşüb. O həkim və o klinika mənim işimə baxmasın. O həkimin xidmətlərindən imtina edirəm”.

Bu sözləri “Cebheinfo.az”-a açıqlamasında aktyor Elşad Məmmədov deyib.

Aktyor Neftçilər Xəstəxanasında oftalmoloq Elşən İbrahimovun həyata keçirdiyi əməliyyatdan sonra vəziyyətinin daha da pisləşdiyini iddia edir:

“Mən TƏBİB-ə müraciət etmişəm və bildirmişəm ki, həkimdən şikayətçiyəm. Hələlik TƏBİB-dən dəqiq cavab yoxdur. Üç dəfə zəng ediblər, vəziyyətimi soruşublar. Soruşdular ki, əməliyyatın təkrar olunmasını istəyirəm, yoxsa ödənilən məbləğin geri qaytarılmasını?

Mən də dedim ki, həkim mənə sağlamlığımı qaytarmayıbsa, ona əlavə olaraq pul vermişəm, onu ödəsin gedim başqa yerdə müalicə olunum. Həmin pulu 3 il əvvəl ödəmişəm. İcbarı sığortadan əlavə, mən ona 400 manat da vermişdim. TƏBİB-ə bütün detalları, həkimin etdiyi hər şeyi yazmışam. Müraciətimin sonunda qeyd etmişəm ki, əgər siz bu məsələdə mənə kömək etməsəniz, ali orqanlara müraciət edəcəyəm".

Aktyor 2022-ci ilin sentyabrında Neftçilər Xəstəxanasında mirvari suyu (katarakta) diaqnozu ilə əməliyyat olunub:

"Əməliyyatdan əvvəl həkim mənə dedi ki, həm mirvari suyu, həm də "toyuq korluğu" var. Üstəlik dedi ki, mirvari suyu "toyuq korluğu"dan daha təhlükəlidir. Ona görə də əməliyyatın vacib olduğunu bildirdi. Lakin sonradan internetdə araşdırma apardım və bir neçə həkimlə danışdım. Məlum oldu ki, "toyuq korluğu" (gözün gecə görmə zəifliyi) olan insanı əməliyyat etmək olmaz.

Mən başa düşə bilmirəm ki, həmin həkim nəyə görə belə edib. Həkimin dediyinə görə, məndə "toyuq korluğu" irsi olaraq olub və bu yatmışdı. Əməliyyatdan sonra artıq 3 il keçib və bu müddətdə mən filmlərə çəkilə bilərdim. Sağlamlığım isə əvvəlkindən daha da pis vəziyyətə düşüb”.

Elşad Məmmədovun iddiasına görə, əməliyyatdan əvvəl həkimin köməkçiləri ona hər göz üçün icbari tibbi sığortadan əlavə, 200 manat ödəməli olduğunu bildiriblər:

“Əməliyyatdan əvvəl həkimin köməkçiləri mənə dedilər ki, hər göz üçün icbari sığortadan əlavə 200 manat ödəməliyəm. Səbəb olaraq dedilər ki, mənə Amerika istehsalı olan linza qoyulacaq. Amma birinci əməliyyatdan sonra mənə verilən linzanın qablaşdırmasına baxdım, gördüm ki, üstündə Çin dilində yazılıb.

Mən əməliyyatda olanda yoldaşıma kağıza imza çəkdiriblər. Sonradan xahiş etdim ki, ya mənə daha keyfiyyətli bir linza qoyulsun sağlamlığım bərpa olunmaq şərti ilə, və o həkim və həmin klinika mənim işimə baxmasın. O həkimin xidmətlərindən imtina etdiyimi bildirdim.

Onlar isə mənə dedilər ki, siz pulun qaytarılmasını istəyirsiniz? Mən də dedim ki, həkim mənim sağlamlığımı əlimdən alıb, üstəlik 400 manat əlavə pul da alıb. Bu pulu geri qaytarmalıdır. Mən gedib başqa bir klinikada, öz cibimin pulu ilə yeni bir linza alım”.

Aktyorun dediyinə görə, ən təəssüf doğuran məqamlardan biri həkimin onunla qeyri-etik şəkildə danışması olub:

“Həkim isə mənə deyir ki, get, əlindən gələni beş qaba çək, mənə heç nə edə bilməzsən. Sən əvvəl bundan da pis gündə idin, indi yaxşısan. Amma mən əməliyyatdan əvvəl “Bir gün sizdə, bir gün bizdə” verilişində qonaq olmuşdum. "YouTube"-da həmin verilişin videosu da var. O çəkilişdə 5 gün qonaqlıqda olmuşduq. Həmin verilişə baxsanız, mənim necə sərbəst şəkildə hərəkət etdiyimi görə bilərsiniz.

Həkimin adı Elşən İbrahimovdur. Mən bir dəfə onunla danışmaq üçün xəstəxanaya getdim. Lakin o, bizimlə kobud davrandı. Biz də baş həkimin yanına getdik. Baş həkim özü həkimlə danışdı. O da gəldi həkimlə danışmağa, amma sanki ovsunlandı. Həkim dedi ki, “Quran” gətirin, Elşad bəy əvvəllər daha pis vəziyyətdə idi, indi yaxşıdır. Amma mən özüm əvvəllər sərbəst şəkildə gəzirdim”.

Məsələ ilə bağlı Neftçilər Xəstəxanasının Mətbuat Xidmətinə sorğu ünvanlamışıq.

Məsələ ilə bağlı Mərkəzi Neftçilər Xəstəxanasının Mətbuat Xidməti bunları deyib:

“Xəstəxanamız dövlət tərəfindən ABŞ istehsalı olan “Alcon” linzaları ilə təmin olunur. Bu məhsullar saxta ola bilməz, çünki onları birbaşa dövlət təmin edir. “Alcon” Amerikanın ən yaxşı və tanınmış firmalarından biridir. İstəsəniz, bu barədə özünüz də araşdıra bilərsiniz. Hazırda xəstəxanamızda yalnız həmin linzalar mövcuddur, başqa linzamız yoxdur. Əgər sorğunu yazılı şəkildə təqdim etsəniz, məsələni araşdıraraq sizə rəsmi və ətraflı məlumat təqdim edə bilərik”.